Ақтөбе мектебінде қара жамылған әйелдер қардың үстінде тұрып намаз оқыды

Sn.kz

Бұл оқиға Ақтөбе қаласындағы №56 орта мектепте болған.

Ақтөбе мектептерінде хиджаб дауы сейілер емес. Осыдан екі-үш күн бұрын "діндар" ата-аналар облыстық әкімдік ғимаратына басып кіріп, Бердібек Сапарбаевпен кездесуді талап еткен болатын. Бұл әрекеттерінен түк шықпаған соң олар мектеп ғимаратының алдына барып, қардың үстінде тұрып намаз оқыды, - деп жазады Sn.kz.

Аталған көріністің суретін әлеуметтік желіге шымкенттік заңгер Айгүл Орынбек жүктеді. Оның айтуынша, бұл оқиға Ақтөбе қаласындағы №56 орта мектепте болған.

«Мынау не енді? Осындай көзбояушылық кімге керек? Мектептің алдында намаз оқып, кімге не дəлелдемекші? Елімізді Сирияға айналдырмақшы ма? Неге тыныш жүрмейді? Қай ата-бабаң қара жамылған? Министр Ермекбаев мырза, еліміздің батыс жағын шұғыл қолға алу керек! Мыналар жақсылыққа алып бармайды! Депутаттар мыналарға қарсы заң қайда?», - деп жазды А.Орынбек өзінің Facebook-парақшасында.

Айта кетейік, оқушылар арасындағы хиджаб дауы елімізде соңғы бірнеше жылдан бері жалғасып келеді. Әр жаңа оқу жылы басталған сайын мектептерге хиджаб киіп келетін оқушылардың ата-аналары мен мектеп әкімдігі қырық пышақ болып айтысып жатады. Өйткені, оқу орындарына діни киім киіп келу заңмен шектелген.