Астанада аялдаманы соққан жүргізушіге 2 млн теңге айыппұл салынды

Жылжымайтын меншікті жөндеуге кеткен қаражат 1 921 795 теңгені құраған.

Астанада аялдаманы соққан шетелдік көлік жүргізушісіне 2 млн теңге айыппұл салынды, деп хабарлайды ҚазАқпарат елордалық соттың баспасөз қызметіне сілтеме жасап.

«Mitsubishi жүргізушісі көлікті басқара алмай, елордалық компаниялардың біріне тиесілі аялдама кешеніне барып соғылған. Ер адам ҚР Әкімшілік құқықбұзушылық туралы кодекстің 610-бабының 1-бөлігіне сәйкес әкімшілік жауапқа тартылып, айыпты деп танылды», - делінген хабарламада.

Жылжымайтын меншікті жөндеуге кеткен қаражат 1 921 795 теңгені құраған. Астана қаласы Сарыарқа аудандық соты осы материалдық шығынды жүргізушіден өндіруге шешім шығарды.

Шешім заңды күшіне енген жоқ.