Атырауда кәмелет жасқа толмаған 4 оқушы қыз жүкті болып қалған
Stan.kz
Атырауда кәмелет жасқа толмаған 4 оқушы қыз жүкті болып қалған. Бұл туралы Атырау облысы әкімдігінің жанындағы қоғамдық кеңес отырысының барысында Атырау қаласының әкімі Серік Шәпкенов айтты, деп хабарлайды Stan.kz.
Серік Шәпкеновтің сөзінше, соңғы 2 жыл ішінде 15-17 жас аралығындағы кәмелетке толмаған қыздар арасында ерте жүкті болу фактісі төмендей бастаған.
«2016 жылы қалада кәмелет жасқа толмаған 23 қыз жүкті ретінде тіркелсе, 2017 жылы мұндай 8 жағдай анықталды. Жыл басынан бері қалалық білім бөлімінің мамандары 4 қызды тіркеуге қойған», – дейді Серік Шәпкенов.
Қала басшысының сөзінше, жүкті болып қалған 4 қыз қазіргі уақытта отбасылы. Олар кешкі мектепте білім алады екен.
Анықталғандай, қазіргі уақытта жастар арасында мұсылманша неке қию сәнге айналған.
Сонымен қатар өткен жылы 1 қыркүйекте Атырауда орамал тағып келген 200-ден аса оқушы оқу жылы аяқталғанша сабаққа қатыспағаны анықталды. Олар мектеп формасын киюге қарсылық танытқан.
«Олармен және олардың ата-анасымен қалалық білім бөлімінің мамандары мен дін мамандары түсіндіру жұмыстарын жүргізеді. Көптеген жағдайда ата-аналар мен оқушыларды райынан қайтаруға болады», – дейді Серік Шәпкенов.
Сонымен қатар Атырау облысында сәлафизмді ұстанатын 2 мың тұрғынның 65 пайызы жастар екені белгілі болды.
