Маңғыстау облысының әкімі ҰБТ-дан ең жоғарғы бал алған түлектерді қабылдады

Маңғыстау облысы әкімінің баспасөз қызметі

Биыл Маңғыстау облысы бойынша ҰБТ-ға 4167 түлектің 4123-і қатысты, 844 бала 100 балдан жоғары ұпай жинады.

Кездесу барысында өңiр басшысы Ералы Тоғжанов Маңғыстау облысы бойынша ҰБТ-тан ең жоғары бал алған мектеп түлектерін құттықтап, жастар үшiн ең маңыздысы — білім алу екендiгiн атап айтты.

Қазақстан Республикасының Президенті Нұрсұлтан Әбішұлы Назарбаев «Болашаққа бағдар –рухани жаңғыру» мақаласында: «Адами әлеуетті дамытудың ұзақ мерзімді саясатының арқасында біз қазіргі талантты жастардың жаңа буын ұрпағын қалыптастырдық» -деген болатын.

Облыс әкімі өз сөзінде облыс бойынша ең жоғары 136 бал жинаған Маңғыстау ауданы Шетпе гимназиясының түлегі Ерсұлтан Рахметұлын ерекше атап өтіп, түлектерге жылы лебізін білдірді.

«Ұлттық табысқа, мемлекетті өркениетке жеткізетін білімді елдің болашағы - жастар. Сіздердің алар асуларыңыз, шығар биіктеріңіз әлі алда! Үлкен өмірге басқан қадамдарыңыз құтты болсын! Таңдаған мамандықтарыңыз бойынша жоғары оқу орындарына түсулеріңізге тілектеспін. Сіздерді осындай дәрежеге жеткізген ата-аналарыңызға, ұстаздарыңызға үлкен рахметімді айтамын. Біз Сіздермен мақтанамыз! Алған білімдеріңіз бен біліктеріңізді, күш жігерлеріңізді Отанымыздың, облысымыздың өркендеп, дамуына жұмсайды деп сенемін» - деп, түлектер мен олардың ата-анасына және мұғалімдерге естелік сыйлықты тарту етті.

Өз кезегiнде, түлектер облыс басшына ризашылығын бiлдiрiп, өз жетiстiктерi, алдағы жоспарлары туралы айтып бердi.

Ержан Жанжігітов – Маңғыстау ауданы Шетпе гимназиясының түлегі, «Алтын белгі» иегері. Сынып жетекшісі - Байназарова Қама Асылбекқызы, математика пәнінің мұғалімі.

Ерсұлтан Рахметұлы-Жаңаөзен лицейінің түлегі, тарихтан қалалық олимпиадалардың жүлдегері. Сынып жетекшісі – Менкеева Шынар Жандырбайқызы, география пәнінің мұғалімі.

Биыл Маңғыстау облысы бойынша ҰБТ-ға 4167 түлектің 4123-і қатысты, 844 бала 100 балдан жоғары ұпай жинады. Облыс бойынша үздік нәтиже көрсеткен 10 мектеп: Жаңаөзен лицейі, Шетпе гимназиясы, Жаңаөзен гимназиясы,Мұнайлы ауданы Қызылтөбе лицейі, Жаңаөзен қаласының №19 мектебі, Бейнеу гимназиясы, Жаңаөзен қаласының №8 мектебі, Ақтау қаласынының № 11 мамандандырылған физика-математика мектебі, жаңаөзен қаласының №20 орта мектебі, Жаңаөзен қаласының № 14 орта мектебі.