«БЖЗҚ» АҚ комиссиялық сыйақысы азайтылды
www.zakon.kz
«БЖЗҚ» АҚ 2019 жылға арналған комиссиялық сыйақысы азайтылды. Бұл туралы zakon.kz «БЖЗҚ» АҚ баспасөз орталығы берген ақпаратқа сілтеме жасап хабарлайды.
Қазақстан Республикасы Ұлттық Банкінің қаулысымен «Бірыңғай жинақтаушы зейнетақы қоры» акционерлік қоғамының комиссиялық сыйақысының 2019 жылға арналған шамасы:
1) инвестициялық табыс сомасының 5,0 пайызы;
2) зейнетақы активтерінің айына 0,015 пайызы көлемінде бекітілді.
Еске саламыз, «Қазақстан Республикасында зейнетақымен қамсыздандыру туралы» ҚР Заңына сәйкес Бірыңғай жинақтаушы зейнетақы қорының комиссиялық сыйақысының шекті шамасы: инвестициялық табыстың 7,5 пайызынан және зейнетақы активтерінің айына 0,025 пайызынан аспайтын шекте белгіленеді.
Атап өту керек, аталған шамалар 2014 жылдан бері талай рет азайтылды және көрсетілген шамалардан 2019 жылға қарай:
– инвестициялық табыс сомасынан 33 пайызға (2014 жылы – 7,5%);
– зейнетақы активтерінен 40 пайызға (2014 жылы – 0,025%) төмен.
Бұған Қордың бизнес-үдерістерді оңтайландыру, тиімсіз шығындарды қысқарту, көрсетілетін қызметтердің барлық дерлік түрін электрондық форматқа ауыстыру, көрсетілген қызметтердің жалпы көлемі ішінде олардың үлесін арттыру жүргізу нәтижесінде қол жеткізілді.
БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылды. БЖЗҚ құрылтайшысы және акционері – Қазақстан Республикасы Қаржы министрлігінің «Мемлекеттік мүлік және жекешелендіру комитеті» ММ арқылы Қазақстан Республикасының Үкіметі. БЖЗҚ зейнетақы активтерін сенімгерлікпен басқаруды Қазақстан Республикасының Ұлттық Банкі жүзеге асырады. 2016 жылғы 1 қаңтардан бастап зейнетақы активтерін басқару тиімділігін арттыру бойынша ұсыныстар жасау қызметі Ұлттық қорды басқару кеңесіне берілді. Зейнетақы заңнамасына сәйкес БЖЗҚ міндетті зейнетақы жарналарын, міндетті кәсіптік зейнетақы жарналарын, ерікті зейнетақы жарналарын тартуды, зейнетақы төлемдерін, зейнетақы жинақтары мен төлемдерін жеке есепке алуды жүзеге асырады, салымшыға (алушыға) зейнетақы жинақтарының жай-күйі туралы ақпарат береді (толығырақ www.enpf.kz сайтында).
