Алматы облысында қылмыстық топ ұсталды
zakon.kz
Талғар аудандық полициясы 25 жастағы көлік жүргізушісіне шабуыл жасап, өміріне қауіп төндіріп, көлігін алып кетті деген күдікпен 25-30 жас аралығындағы 3 азаматты ұстады,- деп хабарлайды zakon.kz Алматы облысы Полиция департаментінің баспасөз қызметіне сілтеме жасап.
Оқиға Талғар ауданында орын алған. 17 желтоқсан күні зардап шегуші Алматы қаласының көшесінен 3 жігітті көлігіне мінгізіп, айтылған жерге жеткізуге келіседі. Дегенмен, күдіктілер Талғар ауданының аумағына жеткенде жүргізушіні қарумен қорқытып, қол-аяғын байлап, көліктің жүксалғышына салған. Кейінірек, Жаңалық ауылының маңында жол бойына тастап кеткен.
«Аталған қылмысқа қатысы бар тұлғаларды анықтау мақсатында Талғар аудандық полициясының жедел-іздестіру тобы құрылды. Іздестіру шаралары барысында аталған көлік табылып, осы қылмысқа қатысы бар деген күдікпен 3 азамат ұсталды. Олардың шолақ мылтығы табылып, тәркіленді және қылмыс құралы ретінде іс материалдарына тіркелді»,- деп атап өтті полиция өкілдері.
Сонымен қатар, ведомство таратқан ақпаратқа сәйкес, ҚР Қылмыстық кодексінің 192-бабына сәйкес қарақшылық дерегі бойынша сотқа дейінгі тергеу амалдары жүргізілуде. Күдіктілер уақытша ұстау оқшаулағышына қамаққа алынды.
