Тұрғымбаев полицейлердің формасы туралы: ол маңызды мәселе емес

Қазіргі басты міндет полицейлердің "формасы" емес, "мазмұны" екен.

ҚР Ішкі істер министрі Ерлан Тұрғымбаев үкімет отырысында полицейлердің жаңа формасына байланысты пікірін білдірді, деп хабарлайды Zakon.kz тілшісі.

– Қазіргі күні біз форма мәселесін кейінге қалдырып отырмыз. Шынын айтқанда, бізде одан да маңыздырақ міндет тұр, ең алдымен аттестация өткізуіміз керек. Одан кейін қысқартулар есебінен жалақыны көтеруіміз керек. Содан кейін ғана форма мәселесіне кірісеміз, – деді ол.

Оның айтуынша, дәл қазір басты міндет полицейлердің "мазмұны", қалған мәселелерді кейін де қарастыруға болады.

– Біз үшін ең алдымен полицейлердің мазмұны маңызды, жаңа формаға сосын көшеміз, – деп атап өтті Ерлан Тұрғымбаев.