Алматыдағы марафонда "шындық іздеген" тағы үш адам жазаға тартылмақ

zakon.kz

Полиция істің мән-жайын айтып берді.

"От правды не убежишь", #У меня есть выбор, #ADILSAILAYUSHIN деген жазулары бар баннердің басы-қасында болған тағы бірнеше азаматқа қатысты әкімшілік хаттама толтырылады, деп хабарлайды Zakon.kz.

– Жергілікті полиция деректері бойынша, қазір тағы үш адамға қатысты ҚР ӘҚбК 488 бабы, 1 бөлігі бойынша әкімшілік хаттамалар толтырылуда. Жақын арада олар сотқа тартылады, – деп хабарлады Алматы ПД ресми өкілі Салтанат Әзірбек.

Бұған дейін ол балалармен түсіндіру жұмыстары жүргізілді деген хабар тараған. Әзірбек түсіндіру жұмыстарын жазалау деп санамайды.

– Неге бүгін? Қайтадан ашылған мән-жайларға байланысты шығар. (….) Марафон – Алматының дәстүрлі шарасы, түрлі елдерден қатысушылар келеді, сондықтан қандай да бір заңсыз әрекеттерге жол бермеу үшін, оның ішінде 2013 жылғы Бостондағы Марафондағыдай, полиция қауіпсіздіктің күшейтілген шараларын қолға алады. Кез-келген заңсыз іс-әрекет түбірімен кесіледі. Әлгі жастар бейбіт жиын, шеру ұйымдастыру мен өткізу туралы 488 баптың нормаларын бұзған, – деп хабарлады Әзірбек.

Оның пікірінше, ондай көзқарасты мәдени түрде, құқық аясында жеткізуге болар еді, өйткені біз құқықтық мемлекетте тұрамыз.

– Олардың мақсаттары марафон тақырыбына сай емес болған. Егер салауатты өмір салтын насихаттағанда – оған ешқандай кедергі жоқ. Плакаттар заңсыз деп бағаланды, сот құқықтық бағасын берді, – деді Әзірбек.

Оқи отырыңыз