Тоқаев Борис Джонсонды құттықтады
![RT, сурет - Zakon.kz жаңалық 26.07.2019 18:27](https://kaz.zakon.kz/pbi/WEBP/2023-12-20/file-5484a327-d8e2-4cc6-b7b0-7c5017c5e55f/800x452.webp)
Қасым-Жомарт Тоқаев Борис Джонсонды Ұлыбританияның Премьер-министрі лауазымына сайлануымен құттықтады, деп хабарлады Zakon.kz Президенттің ресми сайтына сілтеме жасап.
Мемлекет басшысы Қазақстан халқының және жеке өзінің атынан Борис Джонсонды Ұлыбритания Біріккен Корольдігінің және Солтүстік Ирландияның Премьер-министрі лауазымына сайлануымен құттықтады.
"Басқарушы Тори партиясының көшбасшысын сайлаудағы Сіздің айқын жеңісіңіз Ұлыбританияның игілігі жолында қол жеткізген таңқаларлық табыстарыңыздың және адал қызметіңіздің мойындалуын көрсетеді", – делінген жеделхатта.
Мемлекет басшысы Қазақстан мен Ұлыбританияның стратегиялық серіктестікті берік достық, өзара сенім мен түсіністік негізде дамытып отырғанын атап өтті. Сондай-ақ Қазақстан Президенті екіжақты ынтымақтастықты одан әрі нығайтуға және жаңа инвестициялық мүмкіндіктердің ашылуына сенім білдірді.
Қасым-Жомарт Тоқаев Борис Джонсонға жаңа қызметте табыс, сондай-ақ, британ халқына бақ-береке тіледі.