Алматыда уақытша жабылған "барахолка" базары өз жұмысына кірісті
видеодан алынды
Қордайдағы оқиғадан соң Алматыда уақытша жабылған барахолка базарын тәртіп сақшылары үш күн күзеткен. Әсіресе ұлттық ұлан сарбаздары базарға жақын орналасқан көшелердің әр бұрышында сап түзеп, күзетті күшейткен, деп хабарлайды zakon.kz КТК телеарнасына сілтеме жасап.
"Саудасы қыз-қыз қайнап жататын бұл базардың жабылғанына бүгін үшінші күн. Тіпті алғашқы күні күштік құрылым өкілдерінің қарасы өте көп болған еді. Қазірдің өзінде базар маңында қаз-қатар тұрған полиция мен әскери көліктер жетерлік. Ал ұлттық ұлан сарбаздары тәртіп сақшыларымен бірге жер үй орналасқан аймақты күндіз-түні күзетіп жүр. Сенбі күні барахолкадағы "Байсат", "Барлық", "Ялян", "Рахат", "Барыс", "Алатау", "Болашақ", "Мизам", "Арлан", "Өжет", "Ақ Бұлақ" және "Кенжехан" базарлары уақытша жабылды. Оған Қордайдағы оқиғадан кейін әлдекімдердің базар ішінде бүлік жасауға үндеу тастауы себеп болғаны айтылды. Осылайша қауіпсіздік мақсатында уақытша жабылған базарлар сейсенбіден бастап әдеттегідей жұмысын жалғастырмақ", - дейді телеарна тілшісі.
