Алматы облысындағы карантин тәртібін бұзушылықтар рейтингі
Алматы облысы ПД баспасөз қызметі
Елімізде төтенше жағдай жарияланғаннан бері Алматы облысы аумағында 89 құқық бұзушылық дерегі орын алған. Оның ішінде ең көп тіркелгені – 42 рет карантин аумағына кіруге немесе тыйым салынған аумақтан шығуға әрекет еткен, деп хабарлайды zakon.kz Алматы облысы ПД баспасөз қызметіне сілтеме жасап.
Аталған деректер бойынша ҚР ӘҚбК 476-бабына сәйкес әкімшілік құқық бұзушылық жасағаны үшін хаттама толтырылған.
Карантин және басқа да мiндеттi санитариялық-эпидемияға қарсы iс-шараларды өткiзуді бұзғаны үшін 27 хаттама жазылған. Ал, жиналыстар, митингiлер, шерулер және демонстрациялар, сондай-ақ ойын-сауық, спорттық және басқа да бұқаралық iс-шараларды өткiзу дерегі бойынша 10 әкімшілік хаттама толтырылған.
Сонымен қатар, тәртіп сақшылары белгiлi бiр жерден, өзiнiң пәтерiнен (үйiнен) кетудің 6 дерегін анықтаған. Тыйым салынса да, алкогольдік iшiмдiктерді және құрамында спирт бар заттарды саудалаудың 4 дерегі әшкере болды.
Жалпы алғанда, 16 наурыздан 8 сәуірге дейінгі кезеңде Алматы облысының аумағында төтенше жағдай тәртібін бұзудың 89 дерегіне жол берген 36 тұлға қамаққа алынып, 42 азамат айыппұл арқалаған. Сондай-ақ, 5 тұрғын ескерту алумен шектелген.
