Алматыда коронавирус жүкті келіншек сап-сау баланы дүниеге әкелді

Pixabay

Әйел жұқпалы аурулар ауруханасынан босатылғанда ұлын перзентханадан алып үйіне бір-ақ шығады.

Алматыда коронавирус жұқтырған әйел сау баланы дүниеге әкелді, деп хабарлайды zakon.kz.

13 сәуірде жүкті әйел №1 қалалық клиникалық ауруханаға науқаспен байланыстағы адам ретінде карантинге жатқызылды. Коронавирус талдауы оң нәтиже берді.

Екі күннен кейін, 15 сәуірде, оған кесар тілігі жасалды. Әйел салмағы 3,5 келіден асатын баланы дүниеге әкелді. Бұл - науқастың екінші баласы.

Жаңа туған нәрестеден бірден талдау алынып, ол теріс нәтиже көрсетті. Шақалақ толықтай сау. Қазір ол балалар бөлімінде, - деді Алматы қалалық Қоғамдық денсаулық басқармасының бастығы Тілеухан Әбілдаев.

Қазір әйелдің жағдайы қанағаттанарлық деңгейде. Жақында ол жұқпалы аурулар ауруханасына жіберіледі.

Әйел қалпына келген кезде ғана қолына ұлын ала алады.

№1 қалалық клиникалық аурухана - уақытша құрылған орталық. Онда коронавирус жүкті әйелдер босандырылады.

Оқи отырыңыз