Қапшағай қаласының әкімі жаңадан тағайындалды
zakon.kz
Алматы облысы əкімінің өкімімен Нұрлан Орынбасарұлы Құматаев Қапшағай қаласының əкімі болып тағайындалды, деп хабарлайды zakon.kz.
Ең алдымен Амандық Баталов қалалық мəслихаттың кезектен тыс 71-ші сессиясында депутаттармен кездесіп, Қапшағайды бұған дейін басқарған Талғат Қайнарбековтің басқа жұмысқа ауысуына байланысты жаңа əкімнің кандидатурасы Президент Əкімшілігінің келісімімен ұсынылып отырғанын айтты. Нұрлан Орынбасарұлының өмірбаянына қысқаша тоқталған облыс басшысы жаңа əкімнің бар жинақтаған тəжірибесін, күш-жігерін қаланың дамуына арнайтынына сенім білдірді. Депутаттар кандидатураны бірауыздан қолдады.
Мұнан соң Амандық Баталов Т. Қайнарбековтің тындырымды жұмысына ризашылығын білдіріп, бұған дейін Іле ауданы əкімінің орынбасары болған Нұрлан Құматаевқа қаланы дамытуда үлкен міндеттер жүктеді.
- Талғат Қанатұлы қаланы төрт жылға жуық басқарды. Қапшағай - ерекше қала. Сондықтан кадр іріктеуде біз əрқашан аса салмақты шешім қабылдаймыз. Бұл ретте Талғат Қанатұлы қаланың əлеуметтік-экономикалық дамуында едəуір жұмыстар атқарды. Жаңа кəсіпорындар ашу, жаңа жұмыс орындарын құру, халықтың əл-ауқатын арттыруда оң нəтижелерге қол жеткізді. Негізгі капиталға 8,7 млрд. теңге инвестиция тартылды. Қалаға биылғы жылы 4,6 млрд.теңге бөлініп отыр. Қалада тұрғын үйлер, демалыс орындары салынып, көл жағалауы абаттандырылды, аулалар қалпына келтірілді, ірі инфрақұрылымдық жобалар іске асырылуда. Қаланың жаңа басшысының алдында осы істерді, мемлекеттік бағдарламалардың орындалуын, Қапшағайдың əлеуметтік-экономикалық дамуын одан əрі жалғастыру міндеті тұр, - деп атап өтті А.Баталов.
Облыс əкімі Экономикалық дамуды қалпына келтірудің кешенді жоспарын іске асыру, Жұмыспен қамту жол картасын нəтижелі орындау, індетпен күрес кезеңінде жұмыс орындарын сақтау мен жаңа жұмыс орындарын ашу бағытында түбегейлі шаралар қабылдау, өңірге инвесторлар тарту жұмысын ары қарай да жүзеге асыруды тапсырды.
- Қапшағайда ірі өнеркəсіп орындары көп. Олардың жұмысы төтенше жағдай кезінде тоқтаған жоқ. Бұл ретте негізінен зардап шеккен шағын жəне орта бизнес, сондықтан сол салаға қолдау көрсету керек. Қазір облыста 51 мыңнан астам адам тұрғын үй кезегінде тұр. Осы кезектегі азаматтарды баспанамен қамтуда жаңадан қабылданған "5-10-20" бағдарламасының тиімділігі зор. Оған қоса "Бақытты отбасы", "Нұрлы жер", "7-20-25" бағдарламалары арқылы да, сол қатарда жеке құрылыс жүргізушілер есебінен де тұрғын үйлер салу көлемін арттыру керек. Қаланың əлеуметтік-экономикасын көтерудегі барлық игі істеріңе облыс əкімі ретінде қолдау көрсетемін, - деді А. Баталов жаңа əкімге қарата.
Нұрлан Орынбасарұлы Құматаев 1970 жылы туған. Алматы мемлекеттік медицина институтын стоматолог дəрігер, Қазақ мемлекеттік заң академиясын заңгер, Шет тілдер жəне іскерлік карьерасы университетін экономика бакалавры мамандықтары бойынша бітірген. Еңбек жолын Алматы қаласындағы #4 стоматологиялық емханасының стоматолог дəрігері болып бастаған. Əр жылдарда Іле ауданы Жетіген ауылдық округі əкімінің орынбасары, Іле ауданы əкімі аппараты Тұрғын үй-коммуналдық шаруашылығы бөлімінің бас маманы, Іле ауданы Байсерке ауылдық округі əкімінің орынбасары, Іле ауданы əкімі аппараты Шағын жəне орта бизнес, Жұмыспен қамту жəне əлеуметтік бағдарламалар бөлімдерінің бастығы болды.
2016 жылдың ақпанынан - Іле ауданы əкімінің орынбасары болып келді.
Алматы облысы əкімінің өкімімен Талғат Қанатұлы Қайнарбеков басқа жұмысқа ауысуына байланысты Қапшағай қаласының əкімі лауазымынан босатылды.
