Талдықорғанда коронавирустық пневмонияны ерте анықтайтын ПАКС орнатылды
Алматы облысының әкімдігі
Алматы облысында Талдықорған қалалық көп салалы ауруханасындағы Жағдаяттық орталық базасында коронавирустық пневмонияны енді басталып келе жатқан кезінен анықтайтын ПАКС-жүйесі орнатылған. Жоба өңірдің 17 медициналық мекемесін қамтиды, қазірдің өзінде 2 мыңдай адам тексерілген, деп хабарлайды zakon.kz Алматы облысы әкімінің баспасөз қызметіне сілтеме жасап.
Бұл – отандық және түрік мамандарының бірлескен жобасы. ІТ-компания директоры Ерлан Жәнібековтің айтуынша, бұл жобаны олар жеке қаражатына жүзеге асырған. Жасанды интеллекті жұмысының көмегімен коронавирустық пневмонияны жаңа басталған кезінен анықтауға мүмкіндік туды. Бұл емдеуді жеңілдетіп, толық сауығып шығатын адам санын арттыруға көмек етеді.
Жалпы коронавирустың болуы мүмкін екінші толқынына дайындық шеңберінде өңірде медициналық мекемелерді құрал-жабдықтармен қамтамасыз ету жұмысы белсенді жүргізілуде. Қазіргі кезде 9 медициналық мекемеде, яғни Панфилов, Алакөл, Кеген, Қарасай, Жамбыл, Талғар, Іле, Еңбекшіқазақ аудандарында және Талдықорғандағы облыстық ауруханада кислород стансасы орнатылып, жұмыс істеп тұр. Таяу күндері Сарқан ауданында осындай станса орнату ісі аяқталады. Сөйтіп, кислород стансасымен қамтылған ауруханалар саны өңірде 13-ке жетеді.
Сол сияқты облысқа 180 жедел жәрдем машинасы, 12 жылжымалы медициналық кешен, 3 цифрлы және 15 жылжымалы рентген аппараттары, сондай-ақ 3 компьютерлік томография, 150 ИВЛ аппараттары және басқа да қажетті жабдықтар сатып алынды.
Атап өтсек, облыста тәулігіне 4,9 мың зерттеу жасай алатын 8 зертхана бар десек, оларда бүгінге дейін барлығы 213 мың ПЦР зерттеу жүргізілген.
