ҰҚК Шекара қызметі әуе апатынан қаза тапқан әскери қызметшілерді еске алды
![ҚР ҰҚК баспасөз қызметі, сурет - Zakon.kz жаңалық 25.12.2020 19:49](https://kaz.zakon.kz/pbi/WEBP/2023-12-20/file-3549b55f-8b9b-4189-a931-3b6cdb2e9b1b/800x452.webp)
Бүгін Түркістан облысында осыдан сегіз жыл бұрын 27 әскери қызметшінің өмірін қиған АН-72 әскери ұшағы апат болған орында, сондай-ақ ҰҚК ШҚ барлық аумақтық бөлімшелерінде еске алу жиыны өткізілді, деп хабарлайды zakon.kz ҚР ҰҚК баспасөз қызметіне сілтеме жасап.
Іс-шараға дін өкілдері және "Застава тарландары" республикалық қоғамдық бірлестігі филиалының ардагер-шекарашылары, сондай-ақ қайтыс болғандардың жақындары, туған-туыстары қатысты.
ҰҚК Шекара қызметі Түркістан облысы бойынша департаменті әскери қызметшілерінің бастамасымен өз елінің нағыз патриоттары – Отан сақшыларын ұлықтай отырып, ұшақ апаты болған орынға мемориалдық тақта орнатылды.
Мемориал басында оңтүстік шекарашылары марқұм болған қаруластарының құрметіне дұға-тілектерін арнап, гүл шоқтарын қойды.
2012 жылдың 25 желтоқсаны күні мемлекетімізде қаралы күн жарияланған еді. Қыстың қытымыр күнінде ел астанасынан Шымкент қаласына бет алған ҚР ҰҚК Шекара қызметінің АН-72 әскери ұшағы апатқа ұшырады.
Сайрам ауданы Тассай елді мекені маңында орын алған ұшақ апатынан 27 адам қаза тапты. Бұл тәуелсіз ел тарихында болған ең ірі қайғылы оқиға еді.