Нұр-Сұлтанға Ресей премьері Мишустин келе жатыр

Ол Қасым-Жомарт Тоқаевпен және Елбасымен кездеседі.

18-19 тамызда РФ Премьер-министрі Михаил Мишустин жұмыс сапарымен Нұр-Сұлтанға келеді, деп хабарлайды zakon.kz РФ Үкіметінің сайтына сілтеме жасап.

Михаил Мишустин ҚР Премьер-Министрі Асқар Маминмен келіссөздер өткізеді. Сонымен қатар, Ресей Премьер-Министрі Қазақстан Президенті Қасым-Жомарт Тоқаевпен және Қазақстан Республикасының Тұңғыш Президенті – Елбасы Нұрсұлтан Назарбаевпен кездеседі, делінеді хабарламада.

Кездесулер барысында өнеркәсіп, энергетика, көлік, мәдени-гуманитарлық салалардағы ресейлік-қазақстандық ынтымақтастықты дамытудың өзекті мәселелерін талқылау жоспарлануда.

Сонымен бірге, Еуразиялық экономикалық одақ аясындағы ынтымақтастықты кеңейтуге және коронавирус инфекциясына қарсы бірлескен шараларға ерекше назар аударылатын болады.