Сенатта мемлекеттік басқарудағы өкілеттіктерді қайта бөлу туралы заң жобасы қаралды
Н.Байбулин
Сенаттың Экономикалық саясат, инновациялық даму және кәсіпкерлік жөніндегі комитетінің кеңейтілген отырысында депутаттар мемлекеттік басқару деңгейлері арасындағы өкілеттіктерді қайта бөлу жөніндегі заң жобасын талқылады, деп хабарлайды zakon.kz.
Құжатпен 46 заңнамалық актіге, оның ішінде 2 кодекске және 44 заңға өзгерістер мен толықтырулар енгізу көзделіп отыр. Мысалы, Ұлттық экономика министрлігі ең төменгі әлеуметтік стандарттың бірыңғай нысанын әзірлеу және бекіту функциясын өзіне алады Ал Индустрия және инфрақұрылымдық даму министрлігі жолаушылар мен олардың заттарын, оның ішінде қол жүгі мен багажын тексеріп қарауды жүргізу тәртібі мен талаптарын бекітетін болады.
Депутаттардың айтуынша, заң жобасын қабылдау мемлекеттік басқару жүйесінің тиімділігін арттыруға және аса маңызды функцияларды орындауға назар аударуға мүмкіндік береді. Сонымен қатар, орталық және жергілікті органдардың дербестігі ғана емес, сондай-ақ қабылданған шешімдер үшін дербес жауапкершілік те арта түсетін болады.
Сенаторлар отырыс қорытындысы бойынша заң жобасын Палатаның қарауына беру туралы шешім қабылдады.
