Қазақстандағы сумен жабдықтау жүйелерінің жартысы тозған
Zakon.kz
ҚР Парламенті Сенатының жалпы отырысында үш жылдық республикалық бюджет жобасын талқылау кезінде Палата спикері Мәулен Әшімбаев сумен қамтамасыз ету мәселесі әлі де өзекті екенін айтты, деп хабарлайды Zakon.kz.
Суға қол жеткізу проблемасы еліміздің 700 мыңнан астам азаматы үшін өзекті. Біз мұнда жүйелік мәселелерді көреміз. Атап айтқанда, сумен жабдықтау жүйелерінің тозуы шамамен 50 %-ды құрайды, – деді Әшімбаев.
Оның айтуынша, барлық елді мекендерді сумен қамтамасыз ету бойынша 2020 жылға қойылған мақсатқа бірқатар себептер бойынша қол жеткізілген жоқ. Олардың бірі – бұл мәселеде жоғары орталықсыздандыру. Әртүрлі бюджеттік бағдарламалар сумен қамтамасыз ету мәселелерін қамтиды.
"Қуатты өңірлер – ел дамуының драйвері" бірыңғай жобасы қабылданды. Ұлттық жоба шеңберінде желілерді дамыту, таза ауыз суға қол жеткізуді қамтамасыз ету және тағы басқа мәселелерді шешу қамтамасыз етілетін болады. Бұл жұмысты нақты үйлестіру өте маңызды, біз Мемлекет басшысының еліміздегі барлық елді мекендерде суға 100 % қол жеткізуді қамтамасыз ету жөніндегі тапсырмасын уақытында орындауымыз қажет", – деп түсіндірді палата спикері.
Ол Екібастұзда Моноқалаларды дамыту жөніндегі Кеңесте президент су тұтыну тәсілдерін өзгерту, су тұтыну мониторингі жүйесін, жаңа технологияларды енгізу мәселесін көтергенін еске салды.
Егер біздің заңдарымызға су тұтыну және сумен қамтамасыз ету саласындағы көзқарастарды өзгерту бойынша қандай да бір өзгерістер мен толықтырулар жедел енгізу қажет болса, депутаттар бұл жұмысты тез жүргізуге және үкіметтің бастамаларын қарауға мүдделі. Біз бұл бағытта белсенді жұмыс істеуге дайынбыз, – деді Сенат басшысы.
Бақытжан Отарбаева
