Мәулен Әшімбаев Қазақстандағы өрт сөндіру жүйесін тиімсіз деп атады

Сурет: senate.parlam.kz

Сенат спикері Мәулен Әшімбаев 15 маусымдағы жалпы отырыста Қазақстандағы өрт сөндіру жүйесін тиімсіз деп атады, деп хабарлайды Zakon.kz.

Мәулен Әшімбаевтың айтуынша, Абай облысындағы өрт біздің өрт сөндіру жүйеміздің қаншалықты тиімсіз екенін көрсетті.

"Бұл жерде дау-дамай болмауы керек. Біз 14 зардап шегуші туралы айтып отырмыз. Орман өртіне алғаш рет тап болсақ, түсінуге болар еді. Бірақ жыл сайын осындай жағдайға кезігеміз. Былтыр күзде ірі өрт болған еді. Қостанай облысында 40 мың гектар жер өртенді. Сондықтан үкімет осы бағытта жұмыс істеп жатырмыз деп ақпарат берді. Бірақ болған жағдай біздің жүйенің тиімсіз екенін, мұндай жағдайларға дер кезінде жауап бере алмайтынын көрсетеді. Сондықтан бұл жүйені түбегейлі өзгертуіміз керек. Менің ойымша, уақыты келді. Бұл үшін мемлекет басшысының тиісті тапсырмасы бар".Мәулен Әшімбаев

Ол 2024 жылға арналған бюджетті қараған кезде депутаттардың осы бағыттағы қаражатты қолдауы керек екенін қоса кетті.

"Оның ішінде қазір 100 миллиард бөлініп жатыр. Біз олардың тиімді пайдаланылуын, мақсатты жұмсалуын бақылауымыз керек және нәтиже болуы керек. Ал біз жауапты болып, осыны қамтамасыз етуіміз керек. Егер тиісті бағдарлама қабылдап, миллиардтаған қаржы бөліп, бірақ мұндай жағдайлар келесі жылдары қайталанса, бізді көп сынға алады".Мәулен Әшімбаев

Абай облысындағы өрт 8 маусымда қайта тұтанды. Кейінгі мәліметтер бойынша, 60 мың гектар орман өртеніп кеткен. Өртке тойтарыс бермек болған "Семей орманы" қорығының 14 қызметкері қаза тапты.

14 маусым күні сағат 21:00-де ұшу және жедел жағдайды бағалау қорытындысы бойынша Төтенше жағдайлар министрлігі өрт сөнгенін хабарлады.

Оқи отырыңыз