Қазақстандық шахматшылар ІХ командалық әлем чемпионатында күміс жүлде жеңіп алды
Сурет: Қазақстан шахмат федерациясы
Санаулы сəттер бұрын қазақстандық ойыншылар Грузияға жол берді. Алғашқы раундта грузиялықтар 2½-1½ есебімен алға шыққан. Сосын 2-айналымды да өз пайдасына аяқтады (3½-½).
Команда сапындағы Бибісара Асаубаева, Әмина Қайырбекова, Меруерт Камалиденова мен Алуа Нұрманова өнер көрсетті. Бұл – Павел Коцур баптайтын ұлттық құраманың бәсекедегі алғашқы жеңілісі. Осыған дейін Қазақстан топтық кезеңде Грузиямен тең түсіп (2-2), қалған қарсыластың бәрін ұтқан.
Бүгін Қазақстан әйелдер арасындағы командалық әлем чемпионатында жүлде алған 6 мемлекеттің біріне айналды. Қазақстанның бұған дейінгі ең жақсы нәтижесі ширек финал еді.
Ал Грузия осымен 2-рет әлемдік додадан алтынына қол жеткізіп, бұл көрсеткіш жағынан Ресеймен теңесті.
Қазір қола медаль үшін АҚШ пен Франция құрамасы таласып жатыр. Алғашқы раунд 2-2 аяқталған.
