"Астана" Конференция лигасының топтық кезеңіндегі ойында "Динамодан" жеңіліп қалды
Сурет: instagram.com/fca.astana
Кездесуді астаналық команда футболшылары белсенді бастады. Дегенмен олардың тарапынан көп қателік болды.
Астаналық команда плей-офф сатысына өту үшін осы кездесуде жеңіске жетуге тиіс еді.
Ойынның 12-минутында хорватиялық команда қақпасына белгіленген пенальтиден Дембо Дарбо мүлт кетті. Бірінші кезеңде таблодағы есепке өзгеріс енген жоқ.
Екінші кезеңді "Астана" футболшылары белсенді бастаған еді.
Соған қарамастан, 48-минутта хорватиялық командадан Габриэль Видович гол соғып кетсе, Такуро Канеко 79-минутта қорытынды есепті белгіледі.
Осылайша, "Астана" қарсыласына 0:2 есебімен жеңіліп қалды.
"Астана" мен "Динамо Загреб" бұған дейін бес мәрте шеберлік байқасты, бәрінде хорватиялық клуб басым түсті.
"Астана" енді 15 желтоқсанда сырт алаңда чехиялық "Викториямен" кездеседі.
