Олимпиада жолдамасын ұтып алған отандық спортшы TikTok-та да өте танымал болып шықты
Сурет: Instagram/sertayyerlik
Бір жарым жылдан бері Ерлік TikTok парақшасында семсерлесумен байланысты түрлі әрі қызықты видеолар орналастырып, көптің жүрегін жаулап келгені белгілі болды. Миллионнан астам лайық жинаған видеоларда спортшы өмірінің кәсіби қырын танытып, аталған спорт түріне қатысты кез-келген сұрақтарға жауап беріп отырады.
Мысалы, Ерлік "Етік киген мысықтың" семсерлесу тәсілдерін түсіндіріп, тіпті егер ол сол қылыш қаруы жаппай қолданылған заманда өмір сүрсе, олардың арасындағы ықтимал жекпе-жектің қалай болатынын да болжаған. Ал төмендегі видеода ол Wednesday атты атақты сериалда кейіпкердің семсерлесу кезінде шекесі неге қанағанын түсіндіреді.
Ерліктің 10-нан астам видеосы 1 миллионнан астам қаралым жинаған. 8 миллионға дейін қаралған видеосы да бар. Әзірге оның 40 мың жазылушысы бар және барлық видеосы орташа есеппен 2,4 миллион лайық жинаған. Ал Instagram-дағы парақшасының белсенді жүргізіліп отырғанына қарамастан, ондағы көрсеткіштер әлдеқайда қарапайым. Бірақ Ерліктің жанкүйерлерінің пікірінше, бұл - уақытша мәселе.
24 наурызда семсерлесуден Қазақстан командасы Париждегі Олимпиада жолдамасын ұтып алды, бұл осы спорт тарихындағы алғашқы жетістік екенін тағы да атай кетелік.
