Елордалық қос спортшы дәстүрлі садақ атудан қола медаль иеленді

V Дүниежүзілік көшпенділер ойындарында дәстүрлі садақ атудан "Пута" нысанасы бойынша өнер көрсеткен Астана қаласының спортшысы Қасымхан Қанат қола медальға ие болды, деп хабарлайды Zakon.kz.

Астана қаласы әкімдігінің хабарлауынша, 9 қыркүйекте "Пута" нысанасы бойынша (ерлер – 70 метр, әйелдер – 60 метр) жарыс өтті. "Арғымақ" ат-спорт кешенінде өтіп жатқан бәсекеге 33 мемлекеттен 180 спортшы қатысып жатыр. Бұл спорт түрінен бақ сынаған Астана қаласының спортшысы Қасымхан Қанат қола медальға ие болды. Бұдан бұрын тағы бір жерлесіміз әйелдер арасында өнер көрсеткен Айкөркем Батихан қола медаль еншілеген болатын.

Сурет: gov.kz

Бұл спорт түрінен Қазақстан құрамасы сапынан 10 спортшы ел намысын қорғайды.

Айта кетейік бұл спорт түрінен Астана қаласының алты спортшысы бақ сынауда.