Қазақстандық гимнастшы Бакудегі әлем кубогының қола жүлдегері атанды

Қазақстандық гимнастшы Зейнолла Ыдырысов Бакуде (Әзербайжан) өтіп жатқан әлем кубогының қола жүлдегері атанды, деп хабарлайды Zakon.kz.

Ол ат снарядындағы жаттығулар финалында сәтті өнер көрсетіп, төрешілердің шешімі бойынша 14,400 ұпай жинады.

Жеңісті америкалық Брэндон Дэнг (14,633) иеленді. Екінші орынды Патрик Хупс (АҚШ) – 14,533 ұпаймен алды.

Айта кетейік, Қазақстан құрамасының еншісінде қазір үш медаль бар. Бұған дейін Милад Карими (еркін жаттығу) мен Дмитрий Патанин (қоссырықтағы жаттығу) күміс жүлдеге қол жеткізген еді.