Жаңа лауазымға тағайындалған Смайыловты Мишустин құттықтады
Сурет: ҚР Премьер-министрінің баспасөз қызметі
Ресей Федерациясы Үкіметінің төрағасы М. Мишустин Ә. Смайыловты Қазақстан Республикасының Премьер-министрі лауазымына тағайындалуымен құттықтады, делінеді Үкімет басшысы баспасөз қызметінің хабарламасында.
Тараптар стратегиялық әріптестікті екіжақты және көпжақты форматта одан әрі нығайтуға әзір екендіктерін білдірді.
Қазақстан Үкіметі Ресей Федерациясымен стратегиялық серіктестікті тереңдету бағытын берік ұстанады. Сізбен бірге екіжақты күн тәртібінің барлық саласы бойынша Қазақстан-Ресей қарым-қатынасына тән мазмұнды және тұрақты диалогты әрі қарай жалғастыра береміз деп үміттенемін. Біз бұған дейін қол жеткізілген уағдаластықтарды жүзеге асыруға барынша дайынбыз. ҚР Премьер-министрі Әлихан Смайылов
Еуразиялық экономикалық одақ аясындағы екіжақты сауда-экономикалық ынтымақтастық және өзара іс-қимыл мәселелері талқыланды. Ресей – Қазақстанның негізгі сауда-экономикалық серіктесі. Осы жылдың 10 айының қорытындысы бойынша ҚР мен РФ арасындағы тауар айналымының көлемі 30%-ға артып, 19,5 млрд долларға жетті. Бұл ретте сауда құрылымын әртараптандыруда ілгерілеушілік байқалып отыр – Қазақстанның экспорт көлемі 39,4%-ға, оның ішінде өңделген өнім экспорты 47,7%-ға өсті. 2019 жылғы пандемияға дейінгі кезеңмен салыстырғанда сауда көлемі де 21%-дан астамға өсті.
