Қазақстан мергендері халықаралық турнирде 13 медаль жеңіп алды
Сурет: Мәдениет және спорт министрлігі
Мәдениет және спорт министрлігінің мәліметінше, отандастарымыз екі турнирде де ерекшеленіп, барлығы 13 медаль жеңіп алды: 6 алтын, 4 күміс және 3 қола. Олардың барлығы «скиттен» – дөңгелек стендтен ату арқылы жеңіп алынды.
Азия Кубогының «алтынын»: Ольга Панарина мен Зоя Кравченко, Әсем Орынбай және Ольга Панарина бастаған әйелдер құрамасы, Данил Стрельцов пен Адель Садақбаева бастаған жасөспірімдер құрамасы, сондай-ақ микс-команда – Әсем Орынбай және Эдуард Ещенко иеленді.
«Күміс» медальді Эдуард Ещенко, Юнус Мачжон және Артем Седельников бастаған ерлер құрамасы, жасөспірімдер құрамасынан Илья Пеньков пен Амалия Кудрявцева, сондай-ақ Зоя Кравченко мен Юнус Мачжон бастаған аралас команда алды.
Қола жүлдегерлердің үштігінде Әсем Орынбай, Эдуард Ещенко және жасөспірімдер тобынан Эвелина Шек бар.
Ал ең беделді «Кувейт Гран-приі» алтын жүлдесін Қазақстан қоржынына Зоя Кравченко салды. Айтулы жарыста оған тең келер спортшы болмады.
"Стендтік және оқ ату Қазақстанда қарқынды дамып келеді. Бұған біздің құраманың ірі халықаралық турнирлердегі кейінгі нәтижелері дәлел бола алады. Медальдарды тек біздің ересектер командасы ғана емес, жасөспірімдер де жеңіп алғаны ерекше қуантады. Бұл тағы да отандық мергендер мектебінің күші мен Қазақстан жаттықтырушыларының жоғары біліктілігін көрсетеді",-деді Мәдениет және спорт вице-министрі Сәрсен Құранбек.
Азия Кубогы мен «Кувейт Гран-приі» 2 наурызға дейін жалғасады.
