Колумбияда ұшақ апатына ұшыраған 4 бала 40 күннен кейін аман табылды

Оқыс оқиға, сурет - Zakon.kz жаңалық 10.06.2023 13:51

Сурет: Twitter/Gustavo Petro

Колумбияда іздестіру жұмыстарының жүргізіліп жатқанына 40 күн болғанда 4 бала аман табылды. Тірі қалғандар 1 мамырда апатқа ұшыраған Cessna 206 ұшағында болған. Ұшақ апаты салдарынан үш ересек адам қаза тапқан болатын, деп хабарлайды Zakon.kz.

Колумбияда ну орман ішінен ұшақ апатынан кейін 40 күн өткенде 4 кішкентай бала аман табылды, деп жазды ел президенті Густаво Петро Twitter-дегі парақшасында.

"Олар - джунгли балалары, енді олар Колумбияның балалары", - деп жазды Густаво Петро.

Сондай-ақ Густаво Петро желідегі өз парақшасында аман қалған балалар мен оларды тапқан әскери қызметкерлердің суретін жариялады. Төрт бала бір-біріне ағайынды болып келеді, ең кішісі - 1 жаста болса, қалғаны 4, 9 және 13 жаста, деп нақтылайды SNN.

Сенбі күні таңертең Колумбия әуе күштері балаларды санитарлық көлікпен ел астанасы Боготадағы әскери-көлік әуе қолбасшылығына жеткізді. Оған дейін оларды ұшақта дәрігерлер тексерген.

Балалар әбден арып-ашып, қатты әлсіреген, масаға таланған.

Ұшақта бұлардан бөлек тағы үш ересек адам болған. Оның бірі - балалардың анасы Магдалена Мукутуй Валенсия. Үшеуі де ұшақ апатынан қаза тапты. Апат алдында ұшақ командирі жермен байланысып үлгерген. Колумбия президенті әскерилерді аяғынан тік тұрғызып, балаларды іздеуге жұмылдырды.

Оқи отырыңыз