Қанат Бозымбаев Талғар ауданының тыныс-тіршілігімен танысты

Облыс әкімі алдымен Бесағаш ауылындағы блокты-модульді қазандыққа барды.

Бұл қазандық осы жылдың қараша айында іске қосылған. Бесағаш ауылындағы «Нұрия», «Динара групп», «Алма Тау», «Достар», «Бесағаш 2» тұрғын үй кешендеріне қызмет көрсету үшін салынған. Облыс әкімі заманауи, жаңа әрі үнемді, газға қосылған қазандықтың жұмысын оң бағалады.

Сапарының барысында Қанат Бозымбаевқа Бесағаш ауылының оңтүстік-батыс бөлігіндегі «Talgar Eco City», «Аспан сити», «Besagash» және «Достар» тұрғын үй кешендерінің құрылысы жайлы кеңінен баяндалды. Бұл ретте Қанат Алдабергенұлы тұрғын аумақтарды дамыту ісін кешенді түрде қарастыру керектігін қатаң ескертті.

Кешенді құрылыс жоспарына әлеуметтік нысандар салуды да енгізу керек. Оған қоса саяжай массивтері аумағында инфрақұрылыммен қамтамасыз етілген баламалы жер телімін ұсына отырып, тұрғын үйлерді салу мүмкіндіктерін қарастыру қажет. Құрылыс жүргізу барысында жергілікті жерде өндірілген материалдарды қолдануға, қазақстандық мазмұнға басымдық берілуі керек. Ал жұмыс барысында туындаған мәселелерді кезең-кезеңімен шешеміз. Қанат Бозымбаев

Сапар барысында облыс басшысына бұған дейін Бесағаштағы «Алма Тау», «Нұрия» тұрғын үй кешендерін сумен қамтуда туындаған қиындықтарды шешу жолдары баяндалды.

Атап өтсек, су құбырлары бірнеше жерден жарылған еді. Сондықтан қазір су құбырын төсеген мердігер мекеме құбыр желісінің бірінші тармағын қайта ауыстырып жатыр. Жұмыстар жыл соңына дейін аяқталады. Мердігер мекеме екінші тармақты да сапалы құбырға ауыстыратын болды. Мұндағы негізгі қиындық – бұл тұрғын үй кешендеріне берілетін ауыз су көзі Алматыдан тартылған. Сондықтан Бесағаштың оңтүстік бөлігін ауыз сумен қамту желілерінің құрылысын жүргізуге қажеттілік бар. Осыған орай аталған жоба да облыс басшысына таныстырылды.