Қазақстанның 12 өңірінде коммуналдық қызмет тарифі уақытша төмендеді
Сурет: pexels
Ұлттық экономика министрлігінің Табиғи монополияларды реттеу комитеті табиғи монополиялар субъектілерінің 2020-2021 жылға арналған тарифтік сметасын және инвестициялық бағдарламасының орындалуы туралы есептерді талдаудың алдын ала нәтижелерін жариялады.
Мамыр айында монополистердің есептерін қарау және талдау нәтижесі еліміздің 7 өңірінде – Нұр-Сұлтан, Павлодар, Маңғыстау, Жамбыл, Қостанай, Алматы, Шығыс Қазақстан облыстарында коммуналдық қызметтерге тарифтердің төмендегенін көрсетті.
Осы өңірлердегі тарифтерді төмендету сомасы 4,3 млрд теңгені құрады. Оның ішінде 2021 жылға бекітілген уақытша өтемдік тарифтер (УӨТ) жалпы сомасы 151,1 млн теңгеге (қызмет көрсетуге: жылу – 147 млн теңге, су – 3,6 млн теңге, су бұру – 0,639 млн.теңге, электр қуаты – 0,196 млн.теңге).
Маусым айының қорытындысы бойынша 2021 жылға арналған есептер бойынша 12 облыста – Нұр-Сұлтан, Шымкент, Ақмола, Ақтөбе, Алматы, Атырау, Шығыс Қазақстан, Жамбыл, Қарағанды, Қостанай, Маңғыстау, Түркістан облыстарында жалпы сомасы 2,13 млрд теңгеге УӨТ енгізілген.
УӨТ салалар бойынша былай бөлінді:
жылумен қамту – 266 млн.теңге,
сумен жабдықтау – 293 млн.теңге,
су бұру – 54 млн.теңге,
электрмен жабдықтау – 129 млн.теңге,
тауарлық газды тасымалдау – 1,4 млрд теңге.
Нәтижесінде 2022 жылғы 30 маусымдағы жағдай бойынша бекітілген УӨТ жалпы сомасы 6,44 млрд теңгені құрайды (бұрын жарияланған сомаларды қоса алғанда). Біз және оның аумақтық бөлімшелері монополия субъектілерінің есептерін талдауды жалғастырып жатырмыз. Нәтижесі кейінірек хабарланады.Ұлттық экономика министрлігінің Табиғи монополияларды реттеу комитеті
