Екібастұзға Қарағандыдан тағы 70 маман аттанды

Гуманитарлық көмек, сурет - Zakon.kz жаңалық 04.12.2022 09:08

Сурет: Instagram.com/ermaganbetbulekpaev/

Қарағандыдан осымен жетінші күн жылусыз отырған Екібастұз қаласына қалпына келтіру жұмыстарына ат салысу үшін құрылыс және коммунальдық кәсіпорындардың бір топ қызметкері аттанды, деп хабарлайды Zakon.kz.

Қарағанды қаласының әкімі Ермағанбет Бөлекбаев Instagram-дағы парақшасында Екібастұзда жылумен қамтуды қалпына келтіру үшін Қарағандыдан 70 маман жолға шыққанын жазды.

"Облыс әкімінің тапсырмасы бойынша құрылыс және коммуналдық кәсіпорындар қызметкерлерінен құралған бригада құрылды. Күндіз қажетті құралдармен және техникамен толық жабдықталған мамандарымыз Екібастұзға аттанды. Қазіргі уақытта олар қажетті жұмыстарға кірісті. "Энергоцентр" ЖШС, "Қарағанды Су" ЖШС, қаланың құрылыс компаниялары мен барлық қарағандылықтарға шын жүректен алғыс айтамын", деп жазды ол.

Бұған дейін Екібастұзға "Қарағанды Су" және "Қарағанды Энергоцентр" ЖШС-ның 22 маманы, сондай-ақ ТЖД қызметкерлері мен әскери қызметкерлер көмекке барған болатын.

Сонымен қатар, жедел штаб отырысында жылу беруді қалпына келтіру жұмыстарына 7 ірі кәсіпорын жұмылдырылғаны, олардың әрқайсысына көппәтерлі тұрғын үйлер бекітілгені хабарланған.

Оқи отырыңыз