АҚШ Украинаға жаңа көмек пакетін беру басталғанын хабарлады
Сурет: pixabay
Вашингтон алдағы апталарда Украинаға 4,5 миллиард доллар бюджеттік көмек көрсетуді бастауға ниетті. Бұл туралы 11 қазанда АҚШ қаржы министрі Джанет Йеллен украиналық әріптесі Сергей Марченкомен кездесуінде мәлімдеді, деп жазды "Известия".
Йеллен екі апта бұрын конгресс Украинаға тікелей бюджеттік қолдау ретінде 4,5 миллиард доллар бөлу туралы шешімді мақұлдағанын мәлімдеді. Оның айтуынша, АҚШ бұл қаражатты Киевке алдағы апталарда бөле бастайды. Сонымен қатар Йеллен осы төлемді қоса есептегенде, АҚШ Украинаға жалпы экономикалық тұрғыдан13 миллиард доллар бөлгенін атап өтті.
Біз серіктестер мен одақтастарды Украина алдындағы міндеттемелерді тезірек орындау үшін бізге қосылуға және Украинаға өмірлік маңызды қоғамдық қызметтерді қамтамасыз етуді жалғастыруға көмектесуге, сондай-ақ құрылыс пен қалпына келтіруге жәрдем беру үшін қосымша қадамдар жасауға шақырамыз. Джанет Йеллен
Йеллен Украина экономикасының перспективаларын және Киевтің келесі жылға қаржылық қажеттіліктерін зерделеп көруге ниетті екенін айтты.
Біз сондай-ақ АҚШ пен біздің жаһандық коалиция Ресейге, оның мемлекеттік қаржы секторы мен әскери өнеркәсібіне қарсы санкциялар енгізуді жалғастыру жолдарын талқылаймыз. Джанет Йеллен
Йелленнің айтуынша, АҚШ басқа G7 елдерімен бірге ресейлік мұнай бағасына шекті шектеу енгізу жұмысын жалғастырады.
Қазан айының басында президент Джо Байден АҚШ үкіметін 2022 жылғы 16 желтоқсанға дейін қаржыландыруды жалғастыру туралы заң жобасына қол қойды, оның ішінде Украинаға 12,4 миллиард доллар қосымша көмек беру мәселесі де бар. Оның 4,5 миллиард доллары Киевті экономикалық қолдауға, оның ішінде үкіметтік органдардың жұмысын қамтамасыз етуге арналған.
