Джо Байден: Газа секторындағы ауруханаға жасалған қарулы соққыға Израильдің қатысы жоқ
Сурет: wikimedia
The Associated Press хабарлағандай, Израильге сапары кезінде Джо Байден АҚШ Израиль билігіне түсінікпен қарауға уәде бере отырып, 17 қазанда ЦАХАЛ-дың Газа секторындағы ауруханаға қарулы соққы бермегеніне сенімді екенін жеткізді.
Джо Байден Израиль Премьер-министрі Беньямин Нетаньяхуға қаратып айтқан сөзінде: "Біздің көргенімізден мұны сіздер емес, екінші тарап жасаған сияқты пайым туындайды", - деді.
АҚШ Президенті мұндай қорытынды жасауға не түрткі екенін нақтыламады. Кем дегенде 500 адамның өмірін қиған Газа секторындағы ауруханаға жасалған қарулы соққыға қатысты тараптар бір-бірін кінәлауда (Палестина дереккөздері кейіннен 800 құрбан болғанын хабарлады). ЦАХАЛ аурухана орналасқан аймаққа соққы бермегенін және медициналық мекемеге құлаған зымыранды Газа секторының аумағынан "Исламдық жиһад" қозғалысының содырлары атқанын айтады. Бұл ұстанымды Израильдің Қазақстандағы елшілігі де ресми түрде білдірді. Палестиналық содырлар да бұл оқиғаға қатысы жоқ екендіктерін айтуда.
Джо Байден Израильге ресми сапарынан кейін араб елдерінің басшыларымен кездесу үшін Иорданияға бармақшы болған, бірақ ауруханаға жасалған соққыдан соң саммит болмайтын болды. Бұл АҚШ-тың Таяу Шығыстағы жағдайды қалыпқа келтіру әрекеттерін едәуір қиындатады.
