Газа секторындағы қақтығыс алтын бағасының күрт өсуіне әкелді

Таяу Шығыстағы қақтығыс басталғаннан бері сары металл 8%-дан астам қымбаттады. Нәтижесінде инвесторлар активтерін қорғау үшін алтынға ақша сала бастады, деп хабарлайды Zakon.kz.

ХАМАС-тың Израильге жасаған шабуылынан кейін алтын үш айдағы ең жоғары деңгейге көтерілді. Жергілікті минимумда 5 қазанда, қарулы қақтығыстың басталуына бірнеше сағат қалғанда, сары металл бір троя унциясы үшін 1830 доллар шамасында саудаланды. 23 қазанда Астана уақыты бойынша сағат 19.30-да алтынның бағамы бір троя унциясы үшін 1990 доллар болды. Өсім - 8,7%. Оның үстіне, 20 қазанда активтің құны 2000 долларға немесе одан да көпке жетті.

Нью-Йорк COMEX биржасында 20 қазан, жұма күнгі сауда кезінде қымбат металдың құны шарықтау шегінде бір троя унциясы үшін 2008,5 долларға жетті. Жабылу кезінде алтынның бір троя унциясы 1 994,4 доллар болды. Бұл туралы Forbes жазды.