Израиль армиясы Газа секторындағы босқындар лагерін бомбалады: 50-ден астам адам қаза тапты

Израиль, ХАМАС, ЦАХАЛ, соғыс, Палестина, сурет - Zakon.kz жаңалық 01.11.2023 10:39

Сурет: wikimedia

Израиль армиясы ХАМАС қозғалысы командирлерінің бірін өлтірмек болып, Газа секторындағы Джабалия босқындар лагеріне соққы берді. 50-ден астам адам қаза тауып, 150-ден астамы жарақат алды, деп хабарлайды Zakon.kz.

Sky News арнасының хабарлауынша, Израиль қорғаныс күштері Газа секторындағы босқындардың ең ірі лагерлерінің біріне жасаған соққысынан кемінде 50 адам қаза тапты. Газадағы Индонезия госпиталінің мәліметінше, тағы 150 палестиналық, соның ішінде балалар да жараланған.

ЦАХАЛ шабуыл жасағанын мойындады, бірақ мақсаты ХАМАС жетекшілерінің бірі, Орталық Джабалия батальонының командирі Ибрагим Биариді жою болды деп мәлімдеді. Израиль армиясы оның және "көптеген лаңкестің" әуе шабуылынан қаза тапқанын мәлімдеді. Бұған дейін Израиль армиясы ХАМАС-ты бірнеше рет ауруханалар мен босқындар лагерлері сияқты азаматтық нысандарға жақын жерде содырлар лагерлерін құрды деп айыптаған.

"Шекарасыз дәрігерлер" Джабалия босқындар лагеріне жасалған шабуылды айыптап, оны "мағынасыз зорлық-зомбылықтың кезекті эпизоды" деп атады. Ұйымның хабарлауынша, көптеген босқын әл-Шифадағы ауруханаға жеткізіліп, оларға қажетті көмек көрсетілген. Зардап шеккендердің арасында қатты жараланған және күйік шалған балалар да бар.

Оқи отырыңыз