Джеки Чан фильмдердегі трюктерді өзі орындауды қашан тоқтататынын айтты

71 жастағы әйгілі қытайлық актер Джеки Чан қауіпті трюктерді орындауды қашан тоқтататынын айтты, деп хабарлайды Zakon.kz.

Deadline жазуынша, әйгілі актер қазір трюктарды компьютерлік графика мен арнайы эффектілердің көмегімен жасауға болатынын, алайда ол шынайылықты төмендетіп, оның көрерменге әсерін азайтатынын баса айтты.

"Мен әрқашан трюктерді өзім орындаймын. Бұл менің кім екенімді көрсетеді. Мен мұны зейнетке шыққанша жалғастырамын, ал ол ешқашан болмайды," – деді.

Чан өзінің мансабында көптеген жарақаттар алғанымен, трюктерді орындау оның шығармашылығының маңызды бөлігі болып қала беретінін айтты. Ол бұл тәжірибені басқа актерлерге ұсынбайтынын, бірақ өзі үшін бұл жолдан бас тартпайтынын жеткізді.

Осылайша, Джеки Чан өзінің трюктерін өзі орындауды жалғастыра бермек, және бұл оның актерлік мансабындағы басты ерекшелігі болып қала береді.