Алты жастағы британдық бала есірткі контрабандасы үшін ұсталды

Алты жастағы британдық бала Маврикийде ұсталды, себебі кеден қызметкерлері оның чемоданынан 14 килограмм каннабис тапқан, деп хабарлайды Zakon.kz.

NDTV дерегіне сәйкес, бала 22 маусымда Сэр Сивусагур Рамгулам атындағы әуежайда тағы жеті адаммен бірге ұсталған.

Бұл топ жолаушылардың жүгінде жасырылған жалпы 161 килограмнан астам каннабисті алып өтпек болған. Есірткінің жалпы құны — 1,6 миллион фунт стерлинг. Күдіктілердің жетеуі — британдықтар, оның ішінде баланың чемоданынан мөлдір целлофанға оралған 24 бума есірткі табылған.

Бала сөмкесіндегі заттар туралы ештеңе білмеген. 25 маусымда ол Ұлыбританияға қайтарылып, қазір әкесімен бірге тұрып жатыр.

Маврикий билігі баланы есірткі тасымалдау үшін пайдалануды "масқара әрі адамгершілікке жат қылмыс" деп атады. Есірткілерді кедендік есірткіге қарсы бөлім (CANS) мен есірткі және контрабандаға қарсы бөлімше (ADSU) бірлескен операция барысында анықтаған. Шенеуніктер ұсталған топты Еуропадан Маврикийге есірткі жеткізумен айналысатын ұйымдасқан қылмыстық топтың мүшелері деп санайды.

Бұған дейін Сочи халықаралық әуежайында қос ұшақ соқтығысып қалғандығын жазғанбыз.