NASA астронавтары ашық ғарышқа шықты - видео

NASA астронавтары Кристофер Уильямс пен Джессика Меир Халықаралық ғарыш станциясынан ашық ғарышқа шықты. Бұл жұмыстар 18 наурыз күні тікелей эфирде көрсетілді, деп хабарлайды Zakon.kz.

АҚШ-тың Ұлттық аэронавтика және ғарыш кеңістігін зерттеу басқармасының мәліметінше, қазіргі уақытта ХҒС бортында жеті адамнан тұратын халықаралық экипаж жұмыс істеп жатыр. Олардың қатарында "Роскосмос", NASA және Еуропалық ғарыш агенттігінің өкілдері бар. Олар бірлесіп орбиталық зертхананың тұрақты жұмысын қамтамасыз етуде.

Ашық ғарышқа шығу барысында астронавтар станцияның энергетикалық жүйесін жаңартумен айналысты. Олар кабельдер тартып, жаңа күн батареяларын орнатуға арналған инфрақұрылымды дайындады. Бұл жаңартулар ХҒС-тың энергиямен қамтамасыз етілуін жақсартып, алдағы ғылыми миссияларды қолдауға мүмкіндік береді.

Операция Quest шлюзі арқылы басталып, шамамен алты жарым сағатқа созылды. Бұл шығу – станцияны жаңғыртуға бағытталған ұзақ жылдар бойы жүргізіліп келе жатқан жұмыстардың бір бөлігі.

Бұған дейін мысырлық археологтар су астында қалған 80 тонналық шамшырақтың құпиясын ашуда екенін жазғанбыз.