NASA экипаж санының қысқаруына байланысты Crew-12 миссиясының ХҒС-қа ұшырылу уақытын өзгертті

NASA агенттігі медициналық себептермен Crew-11 экипажы Халықаралық ғарыш станциясынан (ХҒС) шұғыл түрде Жерге оралғаннан кейін Crew-12 пилотталған миссиясының ұшырылу мерзімін өзгерту туралы шешім қабылдады, деп хабарлайды Zakon.kz.

Осы жағдайға байланысты Crew-12 миссиясының ұшырылу уақыты 2026 жылғы 15 ақпаннан 11 ақпанға ауыстырылды. Мұндай ақпаратты NASA-ның баспасөз қызметі таратты.

Қаңтар айында Crew-11 экипажының бір мүшесіне медициналық эвакуация қажет болуына байланысты команда ХҒС-ты мерзімінен бұрын тастап кеткен еді. Осыдан кейін орбитада тек үш адам қалды: бір америкалық астронавт және екі ресейлік ғарышкер.

Станциядағы экипаж құрамының қысқаруына байланысты NASA SpaceX компаниясымен бірлесіп жаңа ауысымды жедел жіберу туралы шешім қабылдады. Мұндағы басты мақсат – экипаждың штаттық санын қалпына келтіріп, ХҒС-та жоспарланған жұмыстардың толық орындалуын қамтамасыз ету.

28 қаңтарда Crew-12 миссиясының қатысушылары Хьюстон қаласындағы NASA-ның ғарыш орталығында міндетті екі апталық карантинді бастады. Экипаж құрамына мыналар кірді:

• NASA астронавтары Джессика Мейр мен Джек Хэтэуэй;
• Еуропалық ғарыш агенттігінің астронавты Софи Аденот;
• "Роскосмос" ғарышкері Андрей Федяев.

Сурет: nasa

NASA мәліметінше, карантин ғарыш станциясына жұқпалы аурулардың ену қаупін азайту мақсатында енгізіледі. Осы кезеңде экипаж мүшелерінің сыртқы ортамен байланысы шектеліп, олармен қатынасатын барлық тұлғалар медициналық тексеруден өтеді.

6 ақпанда экипаж NASA-ның Кеннеди атындағы ғарыш орталығына барып, карантин талаптарын сақтай отырып, ұшыру алдындағы дайындықты жалғастырады.

Crew-12 миссиясының ұшырылымы Флорида штатындағы Канаверал мүйісінен жоспарланған. Экипаж SpaceX компаниясының Crew Dragon ғарыш кемесімен, Falcon 9 зымыран-тасығышының көмегімен ХҒС-қа аттанады. Алғашқы ұшыру терезесі 11 ақпан күні Мәскеу уақытымен сағат 14:00-де ашылады. Қосымша резервтік күндер 12 және 13 ақпанға белгіленген.