Сенат "Еуразиялық экономикалық одақ шеңберінде несие тарихы туралы ақпарат алмасу тәртібі туралы келісімді ратификациялау туралы" заң жобасын мақұлдады.
"Бүгінде ЕАЭО-ның кез келген резиденті, мейлі жеке немесе заңды тұлға болсын, ЕАЭО-ның кез келген елінің екінші деңгейлі банкінен несие ала алады. 1 наурыздағы жағдай бойынша ЕАЭО-ның басқа елдерінен екі мыңға жуық жеке және 42 заңды тұлғасына банктерімізден 119,5 млрд теңге несие берілді. Бұл - Ұлттық банктің мәліметі. Бірақ ЕАЭО елдері аясында несиелік тарихпен алмасу мәселесі шешілген жоқ. Талқыланып жатқан келісім бұл олқылықты жояды", - деді Сергей Карплюк.
Оның сөзінше, несие тарихын алмасу адал қарыз алушылардың банк қызметтеріне қолжетімділігін кеңейтеді. Оларға ЕАЭО-ның кез келген еліндегі банктен несие алу оңайырақ болады. Сонымен қатар келісім банктердің өзін қорғайды, бұл қарыз алушының сенімділігін тексеруге және сол арқылы олардың тәуекелін азайтуға мүмкіндік береді. Микроқаржы ұйымдары да несие тарихына қол жеткізе алады.
Сенат спикері Мәулен Әшімбаев стратегиялық міндеттердің бірі халықтың тұтынушы несиені алуын азайту екенін атап өтті. Бүгінде қазақстандықтарға ел ішінде 14 трлн теңге несие берілген.
"Егер біздің азаматтар басқа елдердегі МҚҰ арқылы несие алса, бұл проблемалы борышкерлердің көбеюіне әкелмей ме? Бір жағынан, біз несиенің кейбір түрін шектейміз, ал екінші жағынан, біз белгілі бір проблемалы борышкерлердің басқа елдерден несие алу немесе несие алуға әрекет жасау мүмкіндігіне жол бермейміз"Мәулен Әшімбаев
Қаржы нарығын дамыту және реттеу агенттігі төрағасының орынбасары Олжас Қизатов бұл келісім шетелден несие алу мүмкіндігін азайтуы мүмкін екенін атап өтті. Қазір қазақстандық банктер арасында несие тарихын алмасу жүзеге асырылады.
"Қазір жеке тұлғаның проблемалы несиесі болса, басқа банктерден және МҚҰ-дан несие ала алмайтыны анық. Бірақ ЕАЭО елдері арасында несие тарихын алмасу болмағандықтан, ол теориялық тұрғыдан басқа банктен несие ала алады: Ресейден, Беларусьтен, Қырғызстаннан. Сондықтан осы келісім аясында ЕАЭО елдері арасында несие тарихын алмасуды қамтамасыз етсек, уақытша қиындықтарға тап болған жеке тұлғамыздың басқа елдегі банктерден несие алу мүмкіндігін азайтамыз".Олжас Қизатов
Мәулен Әшімбаев өз кезегінде қанша азаматымыз бен ұйымдарымыз шетелден несие алғаны туралы статистиканы жүргізуді ұсынды.
"Біздің түсінуімізше, сіздерде мұндай статистика жоқ. Сол арқылы қанша азаматымыздың шетелдік несие ұйымдарына қарызы бар екенін білетін едік".Мәулен Әшімбаев
Заң жобасын мәжіліс депутаттары 26 сәуірде қабылдаған. Құжатты ҚР Қаржы нарығын реттеу және дамыту агенттігінің басшысы Мәдина Әбілқасымова таныстырды. Оның айтуынша, Келісім 2019 жылғы 1 қазандағы Жоғары Еуразиялық экономикалық кеңестің шешімімен бекітілген Еуразиялық экономикалық одақтың ортақ қаржы нарығын қалыптастыру тұжырымдамасын іске асыру шеңберінде әзірленген.
