Times of Israel басылымының 12 қазан күні жазуынша, Блинкеннің ұшағы Тель-Авивтегі Бен-Гурион әуежайына қонды. АҚШ-тың мемлекеттік хатшысын Израиль Сыртқы істер министрі Эли Коэн қарсы алды. Антони Блинкен әуежайға жиналған тілшілердің сұрағына жауап берді.
Тель-Авивке ұшпас бұрын Блинкен Таяу Шығыстағы қазіргі жағдайды талқылау үшін Израиль премьер-министрі Биньямин Нетаньяху, Израиль президенті Исаак Герцог және басқа да саясаткерлермен кездесуді жоспарлап отырғанын хабарлаған еді. Ол сондай-ақ АҚШ-тың палестиналық содырлармен қақтығыстарында Израильге қажетті қолдау көрсететінін ашық айтып, ХАМАС қозғалысының әрекетін айыптады.
"Мен Израильге Америка Құрама Штаттарының президенті мен Америка халқының атынан өте қарапайым және түсінікті жолдаумен барамын. Америка Құрама Штаттары Израильмен бірге. Біз бүгін де, ертең де, күнде Израиль халқымен бірге болуымыз керек", – деді мемлекеттік хатшы.
Антони Блинкен ХАМАС тарапынан кепілге алынған америкалық азаматтардың орнын анықтау және оларды құтқару үшін Израиль тарапымен ынтымақтасуға ниетті екенін білдірді. Тель-Авив сапарынан кейін АҚШ мемлекеттік хатшысы Амманға баруды жоспарлап отыр, онда ол Иорданияның жоғары лауазымды тұлғаларымен және Палестина автономиясының басшысы Махмуд Аббаспен кездеседі.