Al Jazeera арнасының мәліметінше, ЦАХАЛ әл-Шифа медициналық орталығындағы операцияларын әлі жалғастырып жатыр.
Al Mayadeen таратқан мәліметтер бойынша, қазіргі уақытта әл-Шифа ауруханасында кем дегенде 6 мың адам, оның ішінде медициналық орталықтың пациенттері мен қызметкерлері, сондай-ақ аурухананы паналаған босқындар бар.
ЦАХАЛ бірнеше күн бұрын қоршауға алынған әл-Шифа ауруханасының аумағында операция жүргізілетінін ресми жариялаған. Израиль әскерилері ХАМАС содырлары аурухананың бір бөлігін жер асты нысандарын жабу үшін пайдаланып жатқанына сенімді. Пентагон да ХАМАС Газа секторындағы ауруханаларды, оның ішінде әл-Шифа ауруханасын әскери мақсатта пайдаланып жатыр деп есептейді.
Дүниежүзілік денсаулық сақтау ұйымының бағалауы бойынша, ауруханада 600-650 науқас, 200-ден 500-ге дейін медицина қызметкері және 1,5 мыңға жуық босқын бар.
Бұған қоса Израиль әскерилерінің Газа секторындағы ең үлкен ауруханаға гуманитарлық көмекті жеткізгені мәлім болды.