Ұшақтың апатқа ұшыраған сәті бейнебақылау камераларына түсіп қалған.
Бейнежазбада ұшақтың тұрғын үйге соғыла жаздап, ағаштар мен қоршауды бұзып өткен соң көлге құлағаны, ал сынықтарының жерге шашылып қалғаны көрінеді.
БАҚ мәліметінше, әуе кемесі жетіден тоғыз адамға дейін сыйғыза алады. Mirror басылымына жергілікті өрт сөндіру қызметі ұшақтың әуеге көтерілгеннен бірнеше минут өткен соң құлағанын хабарлаған. Қайтыс болғандар туралы ақпарат жоқ, іздестіру-құтқару жұмыстары жалғасып жатыр.
Ұшақ Бровард округінен ұшып шыққан. Бұл өңірде кариб-америкалық қауымдастық белсенді өмір сүреді. Олар қазан айының соңында "Мелисса" жойқын дауылынан зардап шеккен Ямайка тұрғындарына көмек жинаумен айналысқан.
Бұған дейін АҚШ-та ұшу кезінде жас жігіт ұшақтың есігін ашып жібермек болып, төтенше жағдай тудырғанын жазғанбыз.