Көлік министрлігінің ақпараты бойынша, мекеме президенті Альп Эр Тунга Ерсой жаңа терминалдың құрылысы туралы толық ақпарат ұсынды.
"Бүгінгі таңда жаңа халықаралық терминал ғимаратының дайындық деңгейі 93% құрайды. Альп Эр Тунга Ерсой терминал үшін барлық қажетті техника мен әуежай жабдықтары сатып алынғанын, оның бір бөлігі қазірдің өзінде орнатылғанын атап өтті", делінген хабарламада.
Жолаушылардың жайлылығы үшін жаңа терминалда әр қабатта ана мен бала бөлмелері, мүмкіндігі шектеулі жандарға арналған қажетті жағдай, балаларға арналған ойын алаңы, сондай-ақ демалыс бөлмелері, бірлескен жұмыс аймақтары, VR-бөлме, үй жануарларына арналған дәретхана қарастырылған. Сонымен қатар жаңа терминалда көпшілік назарына қазақстандық авиация мұражайы ұсынылады.
"Қолданыстағы терминалдың жаңартылуын ескере отырып, Алматы халықаралық әуежайының жалпы өткізу қабілеті жылына 14 млн жолаушыға дейін ұлғаяды. Нысандағы құрылыс материалдарының сапасын бақылау Tav Airports Holding компаниясы Анталья, Тунис, Анкара, Скопье, Загреб және т. б. әуежайларда іске асырған жобалардың стандарттары негізінде жүргізіледі", делінген баспасөз хабарламасында.
Сурет: gov.kz
Әуежай президенті алдағы 50 жылға арналған шеберлік жоспары аясында компанияның жоспарлары туралы да айтып өтті.
Тұжырымдамаға сәйкес, жаңа терминал іске қосылғаннан кейін қолданыстағы терминал ғимараты жаңартылып, ішкі рейстерге қызмет көрсету үшін толығымен қайта жабдықталады. Сонымен қатар екі терминал арасында ыңғайлы транзитті қамтамасыз ететін жер үсті өткелі салынды.