Алматыда ағаштарды биологиялық өңдеу үшін дрон пайдаланылмақ. Биологиялық өңдеудің негізгі бөлігі механикалық аспалы бүркуіштің көмегімен жүзеге асады.
Қалада ағаштарды зиянкестерден сақтау үшін биологиялық өңдеу жұмыстарының бірінші кезеңі басталды. Тиімділікті арттыру үшін жұмыстар түнгі уақытта сағат 23:00 мен 06:00 аралығында жүргізіледі. Аталған уақыт мұндай жұмыстар үшін қолайлы болып саналады. Себебі күн сәулесі дәрілік заттың зиянкестерге әсерін төмендетеді.
Синоптиктердің болжауынша, 21-27 сәуір аралығында жауын-шашын болады. Жауын кезінде биологиялық заттардың белсенділігі төмендейді. Сондықтан жасыл желекті биологиялық өңдеу жұмысы әзірше тоқтатылды.
Өңдеуге ҚР аумағында қолдануға рұқсат етілген қауіптіліктің төменгі санатындағы биологиялық препарат қолданылады. Оның өзіне тән иісі бар. Алайда қоршаған ортаға, адамдарға, үй жануарлары мен өзге де тірі ағзаларға еш зияны жоқ.
