Газ баллон жабдықтарымен жарақтандырылған көлік құралдарын пайдалану және тұраққа қою саласындағы заңнама нормаларының сақталуын бақылауды қамтамасыз ету мақсатында Төтенше жағдайлар министрлігі Ішкі істер министрлігімен бірлесіп үш күндік "ГАЗБАЛЛОН" профилактикалық іс-шарасын өткізді.
Барлығы 600-ден астам рейд жүргізіліп, нәтижесінде 679 адам әкімшілік жауапкершілікке тартылды.
"Профилактикалық іс-шара барысында 10 мыңнан астам адамға, оның ішінде 6 мыңнан астам жүргізушіге түсіндіру жүргізілді. Жанармай құю бекеттерінде газ-баллон жабдықтын қауіпсіз пайдалану және оларға техникалық қызмет көрсету талаптары түсіндіріліп, сонымен қатар тұрмыстық газ баллондарын толтыруға жол бермеу жұмысы жүргізілді", - делінген ТЖМ хабарламасында.
"Еске салсақ, өрт қауіпсіздігі қағидаларына сай өзге мақсаттағы кіріктірілген және оларға жапсарлас салынған ғимараттарда, жер деңгейінен төмен орналасқан автотұрақтар мен жабық үлгідегі үй-жайлар мен паркингтерде газ баллон жабдығымен жарақтандырылған автомобильдердің тұрағына жол берілмейді", - деп қосты ҚР ТЖМ ресми өкілі Жанна Дәуренбекова.