Қарағанды облысы Полиция департаментінің мәліметінше, Теміртау полициясына 18 жастағы қала тұрғыны хабарласқан. Ол өзін екі бейтаныс адам тонап кеткенін айтқан. Олар дүкеннің жанынан өтіп бара жатқан жас жігітке күш көрсетіп, қорқытып, телефонын тартып алған. Содан кейін банк өтініші арқылы 300 мың теңге несие алуға мәжбүрлеп, ізін суытқан. Келтірілген шығынның жалпы сомасы – 500 мың теңге.
Келесі күні дәл осындай екінші қылмыс анықталды. Бұл жолы қарақшылар 19 жастағы жас жігіттің смартфонын тартып алып, оны 200 мың теңге несие алуға мәжбүрлеген.
Криминалдық полиция мен СОБР қызметкерлері жедел түрде екі күдіктіні – 20 және 21 жастағы жергілікті тұрғындарды ұстады. Олар істегендерін мойындады.
"Полиция 191-бап (Тонау) бойынша сотқа дейінгі тергеу барысында ұсталғандардың осыған ұқсас үшінші қылмысқа қатысы бар-жоғын анықтады.
Бұған дейін Оралда қарақшылар 30 мың теңге салынған сейфті ұрлап кеткен.
