"Жүрек жылуы" акциясының волонтерлері Лана Кузнецова мен Мерей Қалелдің айтуынша, бұл сандықтағы тілектер міндетті түрде орындалады.
Сандыққа қазірге дейін 300-ге жуық хат жиналған, алдағы уақытта мұндағы хаттар саны өседі. Олар бұл туралы Jibek Joly арнасының эфирінде айтты.
Телеарна журналисі сандықтан бір хатты алып, Мадияр есімді баланың тілегін оқыды. Редакция болашақта чемпион болғысы келетін баланың тілегі міндетті түрде орындалатынын айтты.
"Менің атым Мадияр. Мен бокспен айналысқанды жақсы көремін. Маған үйде бокспен айналысуға бір бокс грушасы болса жақсы болар еді. Болашақта чемпион болуды армандаймын", - деп жазған ол.
Еске салайық, Президент Қасым-Жомарт Тоқаев та "Жүрек жылуы" акциясына қатысты.
Волонтерлер Мемлекет басшысынан сандықтан алғашқы хатты алып оқуды сұраған.
Қасым-Жомарт Тоқаев хатты оқып, оның иесінің тілегі орындалатынын айтты. Сонымен қатар Президент осынау игі істі бастаған жастарға ризашылығын айтты.
Акцияның мақсаты – наурыз айы бойына халықтың әлеуметтік осал топтарына қамқорлық көрсетіп, көпбалалы отбасылардан, мүмкіндігі шектеулі жандардан, зейнеткерлерден келіп түскен хаттарда жазылған өтініш-тілектерді орындау.
