Бұл жаңалықпен ҚР Ғылым және жоғары білім министрлігі бөлісті.
"Coursera платформада белсенді жұмыс күшінің пайыздық үлесі бойынша цифрлық чемпиондарды – әлемнің үздік 20 елін атады. Қазақстан платформада оқыту белсенділігі бойынша әлемде 18-орынға ие болды", делінген хабарламада.
Сондай-ақ ведомство мәліметінше, Қазақстан жаһандық дағдылар индексі бойынша 109 ел арасында 32-ші орынға ие болды, бұл еліміздегі кадрлардың кәсіби дағдыларын дамытудағы бәсекеге қабілеттілігін көрсетеді.
"Бұл индексті Coursera платформадағы 109 елдің білім алушыларының деректерін талдау негізінде қалыптастырады. Жаһандық дағдылар рейтингі Coursera-да дағдыларды меңгеруді бағалауға, елдің жаһандық инновациялар индексіндегі көрсеткіштеріне, жан басына шаққандағы ЖІӨ-ге, еңбекке қабілетті халықтың қатысу деңгейіне, адами капитал индексіне негізделген".
Айта кетсек, бүгін, 20 шілдеде тамыз айында өтетін ҰБТ-ға қатысу үшін өтініш қабылдау басталды. Сондай-ақ құзырлы ведомство білім беру гранттарының конкурсына қатысу үшін құжат қабылдау жалғасып жатқанын, бұл ретте абитуриенттер қандай құжаттар өткізу керектігін айтты.