Дәрігерлердің айтуынша, 52 жастағы Жапония азаматы қазір ауыр халде жансақтау бөлімінде жатыр.
"17 тамызда жедел жәрдем қызметі ер адамды әуежайдан №2 қалалық көпсалалы ауруханаға жеткізді. Оған ми қан айналымының жедел бұзылуы – инсульт деген диагноз қойылды", - деп хабарлады Астана денсаулық сақтау басқармасы.
Ведомствоның хабарлауынша, шетелдіктерді емдеу "Халық денсаулығы және денсаулық сақтау жүйесі туралы" ҚР Кодексінің 88-бабының 5-тармағына сәйкес жүзеге асырылады.
Еске салайық, кеше, 17 тамызда Токиодан Цюрихке ұшып шыққан Swissair SWR161 рейсі Астана әуежайына шұғыл қонуға мәжбүр болды.
Экипаж 50 жастағы жолаушының инсульт алды деген күдікке байланысты қонуға шешім қабылдаған.