"Жолдарды жөндеуге арналған маршруттар экономикалық орындылығы негізінде ғана емес, сонымен қатар автомобильшілер мен Шығыс Қазақстан облысының тұрғындарының тілектері бойынша таңдалды. Өңірде танымал туристік орындарға апаратын жолдарды жөндеуге және реконструкциялауға ерекше назар аударылды", — деп атап өтті өңір басшысы Ермек Көшербаев Орталық коммуникациялар қызметінде өткен брифингте.
Сурет: ШҚО баспасөз қызметі
Биыл республикалық маңызы бар 392 км автомобиль жолын жөндеу жұмыстары басталды, оның 110 км аяқталды. Облыстық және аудандық маңызы бар жолдарға бөлінетін қаржы 7 млрд теңгеден 15 млрд теңгеге дейін екі есе артты.
Ал ауылдар мен елді мекендердегі көшелер мен жол құрылымдарын жөндеуді қосқанда 31,5 млрд теңге жұмсалды. Нәтижесінде 600 км жол жөнделді.
Бұл ретте бұрын жолдары жөнделмеген 79 ауылдың тоғызында асфальт төселді.
Бұған дейін Қырғызстанмен шекарада электрондық кезекті енгізу жоспарлануда екені хабарланған болатын.